ខ្ញុំសូមលំអត់ឱនអង្គអាត្មា គោរពសាស្តាសម្ពុទ្ធជិនស្រី
ទ្រង់ខំតស៊ូកសាងបារមី រាប់អសង្ខេយ្យព្រោះតែសព្វសត្វ។
ព្រះអង្គជាគ្រូនៃមនុស្សទេវតា មានឫទ្ធិ៍ចេស្តាកិលេសខ្ចាយខ្ចាត់
មិនញាប់មិនញ័រហឫទ័យស្ងប់ស្ងាត់ ខ្ញុំសូមប្រតិបត្តិព្រះជិនវង្ស ។
ទ្រង់ជាអភិសត្វផ្តាច់បង់តណ្ហា មេត្តាករុណាដល់សត្វដែលលង់
វដ្តសង្សាព្រោះភាពខ្លៅល្ងង់ អវិជ្ជាជាទ្រុងបិទបាំងធម្មា ។
គុណទ្រង់អនេកមិនអាចរាប់បាន ផ្សព្វផ្សាយពេញស្ថានទាំងមនុស្សទេវតា
នាំសត្វឲ្យឆ្លងកងទុក្ខវេរា សុខគ្រប់អង្គាបានយល់បាបបុណ្យ ។
បើរាប់សង្ខេបគុណព្រះសាស្តា មាន៣ប្រការអស្ចារ្យពេកពន់
ទី១ ករុណាដ៏ធំលើសលន់
ព្រះទ័យទោរទន់អាណិតសត្តា ។
ទ្រង់អាណិតសត្វដែលរស់គរគោក
រួមទាំងត្រៃលោកដែលពុលកាមា
ចង់ប្រោសពួកសត្វឲ្យរួចទុក្ខា ដាក់ដល់អមតាត្រើយស្ថានឧត្តម ។
ទី២ ឈ្មោះថាវិសុទ្ធិគុណ បរិសុទ្ធអនន្តកាយាស័ក្តិសម
ជាអង្គសម្ពុទ្ធគ្មានគ្រឿងលាយឡំ កិលេសសាំញ៉ាំរលាយគ្មានសល់ ។
ទី៣ ហៅថា បញ្ញាគុណំ តេជៈក្លាខ្លាំងទ្រង់ត្រាស់ដឹងយល់
ចតុរារយសច្ចទាំងឬសគល់ និងក្តីងឿងឆ្ងល់សព្វគ្រប់ប្រការ ។
ដោយអានិសង្សបង្គំវន្ទា អង្គព្រះឈ្នះមារមហាករុណា
សូមគុណព្រះអង្គជួយសាធុការ ដល់អស់សត្តាដែលមានភ័យភិត។
ងងិតងងល់ខ្វះខ្សែប្រាជ្ញា សូមទ្រង់មេត្តាដឹកនាំផ្លូវពិត
ផ្សាយព្រះមហាគុណឲ្យរួចវិបត្តិ ទុក្ខសោកខ្ចាយខ្ចាត់កុំបីសល់ហោង ។
ភិក្ខុ
សិក្ខាជោតោ សាន្តភិរម្យ
