ប្រសិនបើអ្នកចង់សិក្សាស្វែងយល់អំពីវិជ្ជាអ្វីថ្មីជាលើកដំបូង
ដោយត្រូវចំណាយពេលវេលាឲ្យខ្លីបំផុតតែបានផលល្អនោះ មធ្យោបាយដែលល្អបំផុតនោះ គឺអ្នកត្រូវតែមានគ្រូបាធ្យាយផ្ទាល់ខ្លួនម្នាក់
។ គ្រូបាធ្យាយនោះ គឺជាមនុស្សដ៏មានបទពិសោធន៍ខ្ពស់ ហើយដែលកំពុងធ្វើការ
ឬក៏បានធ្លាប់ឆ្លងកាត់មុខវិជ្ជាដែលអ្នកចង់ស្វែងយល់
ហើយក៏ជាបុគ្គលដែលយល់ព្រមធ្វើគ្រូបាធ្យាយរបស់អ្នកដែរ។ មនុស្សភាគច្រើនដែលមានជីវិតប្រកបដោយភាពជោគជ័យតែងតែកត់ត្រា
និងចងចាំនូវបទពិសោធន៍តស៊ូពីដំណាក់កាលដំបូងរបស់ខ្លួនទុក។
ពួកគេតែងតែជាមនុស្សមានចិត្តរីករាយជានិច្ច
និងធ្វើជាគ្រូបាធ្យាយជាពិសេសចំពោះកូនសិស្សរូបណាដែលសំដែងការពេញចិត្ត
មានជំនឿទុកចិត្ត មានចិត្តតស៊ូឲ្យតម្លៃដល់ការទូន្មាន
និងខ្វះបទពិសោធន៍ខាងផ្នែកនេះពិតប្រាកដមែន ។
លើសពីនេះទៅទៀតក្នុងការបង្ហាត់បង្ហាញណែនាំនោះទៀតសោត
គ្រូបាធ្យាយមួយចំនួនតែងផ្តល់ជាបន្ថែមនូវការណែនាំឲ្យស្គាល់បុគ្គលដែលជា
បណ្តាញរបស់គាត់ដែលមានបទពិសោធន៍ច្រើនប្រហាក់ប្រហែលគ្នានេះថែមទៀតផង។
យ៉ាងណាមិញ
នៅពេលដែលអ្នកដទៃកំពុងជួយអ្នកក្នុងនាមជាគ្រូបាធ្យាយរបស់អ្នក ចូរអ្នកត្រៀមខ្លួនធ្វើជាគ្រូបាធ្យាយសម្រាប់អ្នកដទៃទៀត
ព្រើវាក៏ជាតួនាទីដ៏ចម្បងរបស់អ្នកដែរ។ នេះហើយជាចំណុចចម្បងមួយនៃ “គោលការណ៍សកម្ម” គឺថាអ្នកណាក៏អាចជួយអ្នកណាបានដែរ
គ្រប់គ្នាត្រូវជួយគ្នាទៅវិញទៅមកទោះបីជាខ្លួនកំពុងតែទទួលជំនួយពីគេបន្តក្តី។
ចូរសាកល្បងគិតទៅមើលថា រយៈពេល ៥នាទី
តើអាចធ្វើឲ្យមនុស្សពុំស្គាល់ម៉ាស៊ីនកុំព្យទ័រសោះខុសប្លែកពីមុនបានទេ? ពិតជាអាច! ។
ដូច្នេះ ចូរត្រង់ត្រាប់ស្តាប់ការណែនាំនូវពាក្យសម្តីដែលប្រកបដោយបទពិសោធន៍
គឺសម្រាប់ខ្លួនឯងផង និងដើម្បីនឹងយកទៅកែច្នៃក្នុងការណែនាំជាបន្តទៀតផង។
(ដកស្រង់ចេញពីសៀវភៅ
គោលការណ៍សកម្មទាំង ១០០ ប្រការដើម្បីជោគជ័យទំព័រ ៨៩)
